హోం మంత్రి పదవికి రాజప్ప రాజీనామా..? వారించిన చంద్రబాబు

Posted: 08/02/2015 07:56 PM IST

ఏ రాష్ట్రంలో అయినా హోంశాఖ అనగానే ముఖ్యమంత్రి తరువాత అంతటి విలువైన పదవిగా గుర్తింపు వుంది.. దీంతో ఆ పదవిని అందుకోవాలని కలలు కనే వారి సంఖ్య కూడా అధికంగానే వుంది. ఉప ముఖ్యమంత్రి, ఆర్థిక మంత్రిలాంటి ఎన్ని శాఖలున్నా.. హోంశాఖకే ప్రాధాన్యత ఇస్తారు. కానీ ఆంధ్రప్రదేశ్‌లో పరిస్థితి ఇందుకు భిన్నంగా ఉంది. ఆ శాఖకు మంత్రిగా ఉన్న నిమ్మకాయల చినరాజప్ప మాత్రం ఈ హోంశాఖ నాకొద్దు బాబుగారూ.. అంటూ చంద్రబాబుకు మొరపెట్టుకుంటున్నారట.  అంతేకాదు తన పదవికి కూడా రాజీనామా చేసి.. సీఎం చంద్రబాబుకు అందించారు. ఆయన హోం శాఖను ఎందుకు వద్దనుకుంటున్నారు?
 
పోలీసుల తీరుపై చినరాజప్ప చాలా అసంతృప్తితో ఉన్నారు. వరుస సంఘటనలు ఆయనను నిరాశకు గురి చేశాయట. ఆ అసంతృప్తి ఏ స్థాయిలో ఉందంటే ఆ హోంశాఖే తనకొద్దనే స్థాయిలో ఉందట. గోదావరి పుష్కరాల సందర్భంగా రాజమండ్రిలో తొక్కిసలాట జరగడం, ఓటుకు నోటు వ్యవహారంలో ఇంటెలిజెన్స్ వైఫల్యంతో ఆయన ఈ నిర్ణయం తీసుకున్నట్టు సమాచారం. చినరాజప్ప చాలా రోజులుగా తన శాఖలో సమీక్ష సమావేశాలు నిర్వహించడం మానేశారు. పోలీసు శాఖలో కొత్తగా ఒక్క సంస్కరణ కూడా ఆయన చేపట్టలేకపోయారు.

‘పుష్కరాల తొలిరోజే తొక్కిసలాట ఘటన జరిగిన తర్వాత హోం శాఖను చూస్తున్న డిప్యూటీ సీఎం రాజప్ప.. సంఘటనకు బాధ్యత తీసుకొని తాను రాజీనామా చేస్తానన్నారు. చంద్రబాబు ఆయనను వారించినట్లు సమాచారం. ఏదైనా సంఘటన జరిగితే దానిని సమర్థవంతంగా ఎదుర్కుని సత్తా చాటాలని అంతేకాని, రాజీనామా చేయడంతో ఘటన సమసిపోదని ఆయన రాజప్పకు సూచించినట్లు తెలుస్తోంది. పుష్కరాల తోక్కిసలాట ఘటనకు బాధ్యత తనదిగా చంద్రబాబు చెప్పారని, ఇప్పటికే ఈ అంశమై ప్రజలకు కూడా వివరణ ఇచ్చానని, ఇక రాజీనామా ఆలోచనను మానుకుని శాఖలో సమీక్షలు నిర్వహించి.. అలర్ట్ నెస్ గా వుండేల్లు చూడాలని చంద్రబాబు రాజప్పకు హితబోధ చేసినట్లు తెలుస్తోంది.

జి. మనోహర్