మధురైకి కలాం పార్ధివదేహం.. అంత్యక్రియలకు జయ దూరం..

Posted: 07/29/2015 02:01 PM IST

మాజీ రాష్ట్రపతి అబ్దుల్‌ కలాం పార్థివదేహాన్ని ఢిల్లీలోని పాలెం ఎయిర్‌పోర్టు నుంచి ప్రత్యేక విమానంలో మధురైకి తరలించారు. కేంద్రమంత్రులు వెంకయ్యనాయుడు, పారికర్‌ తదితరులు పార్థివదేహం వెంట ఉన్నారు. మధురైలో కలాం పార్థివదేహానికి తమిళనాడు గవర్నర్‌ రోశయ్య నివాళులర్పించనున్నారు. ఆ తరువాత ప్రత్యేక హెలికాఫ్టర్‌లో మండపానికి ఆ తరువాత రామేశ్వరానికి తరలిస్తారు. మొదట కలాం భౌతికకాయాన్ని ఆయన నివాసానికి తీసుకువెళ్తారు. ఆ తరువాత మజీదుకు తీసుకువెళ్లి ప్రత్యేక ప్రార్థనలు చేస్తారు. ప్రార్థనల తర్వాత మండపంలోని మైదానానికి తీసుకెళ్లనున్నారు. ఈ రోజు రాత్రి 7 గంటల వరకు ప్రజల సందర్శనార్ధం అక్కడే ఉంచుతారు. గురువారం ఉదయం 11 గంటలకు కలాం అంత్యక్రియలు జరుగనున్నాయి.

అబ్దుల్ కలాం అంత్యక్రియలకు ప్రధాని మోదీ, కేంద్రమంత్రులు, వివిధ రాష్ర్టాల ముఖ్యమంత్రులు హాజరకానున్న తరుణంలో తమిళనాడు ముఖ్యమంత్రి జయలలిత మాత్రం అంతిమ సంస్కారాలకు హాజరు కావడంలేదు. అనారోగ్యం కారణంగా తాను హాజరుకాలేక పోతున్నట్లు ఆమె తెలిపారు. తమిళనాడు ప్రభుత్వం తరపున పన్నీర్‌ సెల్వం సహా ఏడుగురు సీనియర్ మంత్రులందరూ కలాం అంత్యక్రియలకు హాజరవుతారని జయ వెల్లడించారు. డాక్టర్ అబ్దుల్ కలాంతో సత్సంబంధాలున్న జయలలిత, ఆయన్ని రాష్ట్రపతి పదవిలో రెండవసారి చూడాలని ఎంతో కోరుకున్నారు.

జి.మనోహర్