హీరో-హీరోయిన్లపై యాసిడ్ దాడి చేసిన డైరెక్టర్

Posted: 07/28/2015 07:15 PM IST

Director ajay kumar acid attack on two bhojpuri actors

రంగుల ప్రపంచంగా పిలువబడే సినీ ఇండస్ట్రీలో ఓ దారుణం చోటు చేసుకుంది. విశ్రాంతి తీసుకుంటున్న హీరో-హీరోయిన్లపై ఓ దర్శకుడు యాసిడ్ దాడి చేసి, అక్కడి నుంచి పరారయ్యాడు. ఆ దాడిలో గాయపడిన ఆ నటీనటులను వెంటనే ఆసుపత్రికి తరలించారు. అయితే.. నటి పరిస్థితి కాస్త విషమంగా వుందని వైద్యులు తెలిపారు. ఈ మొత్తం తతంగం జరిగింది భోజ్ పురి సినీ పరిశ్రమలో!

వివరాల్లోకి వెళ్తే.. రూపాలి (20), వికాస్ (19) అనే ఇద్దరు నటీనటులు ఓ సినిమా షూటింగ్ నేపథ్యంలో చిత్రీకరణ జరుగుతున్న స్పాట్ కి చేరుకున్నారు. అక్కడే వున్న ఓ కాలేజ్ ప్రాంగణంలో వీరిద్దరు విశ్రాంతి తీసుకోవడానికి వెళ్లారు. ఈ క్రమంలోనే వారిద్దరూ నిద్రలోకి జారిపోగా.. ఇదే అదును అని భావించిన అజయ్ కుమార్ అనే సినీ డైరెక్టర్ వారిపై యాసిడ్ దాడి చేశాడు. అనంతరం అక్కడి నుంచి పారిపోయాడు. ఈ దాడిలో ఆ నటీనటులు తీవ్రంగా గాయపడగా.. చికిత్స నిమిత్తం ఆసుపత్రికి తరలించారు. అయితే.. రూపాలి పరిస్థితి విషమంగా వున్నట్లు తెలుస్తోంది. ఆ డైరెక్టర్ ఈ దాడికి ఎందుకు పాల్పడ్డాడన్న కోణంలో పోలీసులు దర్యాప్తు చేయగా.. అసలు విషయం బయటపడింది.

నటి రూపాలిని దర్శకుడు అజయ్ ప్రేమిస్తున్నట్లుగా తెలిసింది. అయితే.. తన ఇష్టానికి వ్యతిరేకంగా నటుడు వికాస్ తో కలిసి నటించేందుకు ఆమె అంగీకరించడంతో, అజయ్ కోపంతో ఈ యాసిడ్ దాడి చేశాడని చెబుతున్నారు. ప్రస్తుతం పరారీలో వున్న అజయ్ కోసం పోలీసులు గాలిస్తున్నారు. ఈ ఘటనపై సమగ్ర సమాచారం ఇంకా తెలియాల్సి వుంది.