బ్యాంకులకు వరుస సెలవులు.. వినియోగదారులు బెంబేలు..

Posted: 03/27/2015 09:36 PM IST

శ్రీరామ నవమి పండుగతో మొదలు కానున్న వరుస సెలవులతో బ్యాంకు వినియోగదారులు బెంబేలెత్తుతున్నారు. శనివారం నుంచి ఏప్రిల్‌ 3వ తేదీ వరకు దేశవ్యాప్తంగా అన్ని బ్యాంకులకు సెలవులు వస్తున్నాయి. మధ్యలో రెండు రోజులు మినహా వరుసగా 5 రోజుల సెలవులతో బ్యాంక్‌ ఉద్యోగులు ఆనందంగా ఉంటే కస్టమర్లు మాత్రం ఆందోళన చెందుతున్నారు. మధ్యలో మార్చి 30, 31వ తేదీల్లో కొన్ని బ్యాంకులు మాత్రమే పని చేయనున్నాయి.

మార్చి 31తో ఈ ఆర్థిక ఏడాది ముగుస్తుండడంతో సెలవులకు ఓ కారణం కాగా... ఆ తర్వాత వచ్చే ఫైనాన్షియల్‌ ఇయర్‌ ప్రారంభంలో పండుగలు క్యూ కట్టడం మరో కారణం. మార్చి 28 శ్రీరామ నవమి ప్రభుత్వ సెలవు. మార్చి 29, ఏప్రిల్‌ 1 అకౌంట్స్‌ క్లోజింగ్‌ సందర్భంగా బ్యాంకులు సెలవు దినాలు పాటించనున్నాయి. ఏప్రిల్‌ 2న మహవీర్‌ జయంతి, ఏప్రిల్‌ 3న గుడ్‌ ఫ్రైడే కావడంతో వరుసగా ఆ రెండు రోజులు బ్యాంకులకు సెలవు. ఏప్రిల్‌ 4న శినివారం పనిదినం అయినప్పటికీ ఏప్రిల్‌ 5న మళ్లీ బ్యాంక్‌లకు ఆదివారం సెలవు. వరుస సెలవులు రావడం బ్యాంక్‌ ఉద్యోగులకు సంతోషంగా ఉన్నప్పటికీ అత్యవసర పనులు ఉన్నవారికి మాత్రం ఇబ్బందులు తెచ్చిపెడుతోంది.

జి. మనోహర్