ITEMVIDEOS: టర్కిష్ విమానానికి ఖట్మాండులో తప్పిన పెను ప్రమాదం

Posted: 03/04/2015 09:14 PM IST

Turkish plane skids off runway at kathmandu airport passengers safe

నేపాల్ రాజధాని ఖట్మాండులో టర్కిష్ విమానానికి పెను ప్రమాదం తప్పింది. త్రిభువన్ అంతర్జాతీయ విమానాశ్రయంలో ప్రతీకూల వాతావరణంలో దిగిన టర్కిష్ విమానానికి భారీ ప్రమాదం తప్పింది. ఇస్తాంబుల్ నుంచి ఖట్మాండు వచ్చిన విమానం వాతావరణం సరిలేకపోవడంతో రన్వే నుంచి జారిపోయింది. పక్కనే వున్న మైదానంలోని మట్టిలోకి దూసుకెళ్లింది. దీంతో ప్రయాణికులందరూ ఒక్కసారిగా ఊపిరి పీల్చుకున్నారు. అంతకు ముందు గంట సేపు దిగేందుకు అవకాశం లేకపోవడంతో ఆకాశంలోనే చక్కర్లు కొట్టింది.

వివరాల్లోకి వెళ్తే.. నేపాల్ రాజధాని ఖట్మాండులోని త్రిభువన్ అంతర్జాతీయ విమానాశ్రయంలో ప్రతికూల వాతావరణంలో దిగేందుకు అనుమతి లేక గంట పాటు చకర్లు కోట్టిన విమానం.. ఎట్టకేలకు సిగ్నల్ లభించడంతో దిగింది. రన్ వేపై విపరీతమైన మంచు, రన్వే కూడా తడిగా ఉండటంతో అక్కడి నుంచి జారిపోయింది. విమానం ముందుభాగం రన్వేను తాకింది. పక్కనున్న మట్టిలో కూరుకుపోయింది. అయితే ప్రయాణికులకు కానీ, విమాన సిబ్బందికి కానీ ఎలాంటి గాయాలు కాలేదని విమానాశ్రయం అధికారులు తెలిపారు.

విమాన సిబ్బంది సహా 227 మంది ప్రయాణికులున్నారని, అంతా సురక్షితంగా ఉన్నారని ఎయిర్ పోర్ట్ జీఎం బీరేంద్ర శ్రేష్ట తెలిపారు. మొత్తం ప్రయాణికులను, సిబ్బందిని అత్యవసర ద్వారం గుండా బయటకు తీసుకొచ్చారు. నేపాల్లో ఉన్న ఏకైక అంతర్జాతీయ విమానాశ్రయమైన త్రిభువన్ విమానాశ్రయంలో పొగమంచు ఎక్కువగా ఉండటంతో పలు స్వదేశీ, అంతర్జాతీయ విమానాలు ఆలస్యంగా నడుస్తున్నాయి, కొన్ని సర్వీసులను రద్దు చేశారు. కాగా ప్రమాదం సంభవించడంతో తమకేమవుతుందోనని అరచేతిలో ప్రాణాలను పట్టుకుని కూర్చున్న ప్రయాణికులు సురక్షితంగా భయటకు వచ్చారు.

జి. మనోహర్