NTV ప్రసారాల నిషేధంపై హైకోర్టు ‘కౌంటర్’

Posted: 01/29/2015 10:28 AM IST

గతంలో ఎన్టీవీ న్యూస్ ఛానెల్’లో రాత్రి 11.30 గంటల సమయంలో ప్రసారమయ్యే ‘సినీకలర్స్’ ప్రోగ్రామ్’లో అసభ్యత, అశ్లీలత ఎక్కువగా వుందని ఫిర్యాదు అందిన మేరకు కేంద్ర సమాచార, ప్రసార మంత్రిత్వశాఖ ఆ కార్యక్రమ డీవీడీలను పరిశీలించిన అనంతరం ఎన్టీవీ ప్రసారాలను ఓ వారంరోజులపాటు(ఫిబ్రవరి 3-10) నిలిపివేస్తున్నట్లు యాజామాన్యానికి ఉత్తర్వులు జారీ చేసిన విషయం తెలిసిందే! అయితే.. ఈ ఉత్తర్వులను సవాలు చేస్తూ రచన టెలివిజన్ లిమిటెడ్ (ఎన్టీవీ) సంస్థ డైరెక్టర్ టి.రమాదేవి హైకోర్టులో పిటిషన్ దాఖలు చేశారు. 2012లోనే ఈ కార్యక్రమాన్ని నిలిపివేసి, కేంద్రానికి రాతపూర్వకంగా వివరణ ఇచ్చినప్పటికీ.. ఇప్పుడు వారంరోజులు నిషేధం విధించడం సరికాదని ఆ పిటిసన్’లో పేర్కొన్నారు.

ఎన్టీవీ యాజమాన్యం వేసిన పిటిషన్’ను పరిశీలించిన హైకోర్టు.. కేంద్రం అమలు చేయనున్న ఆ ఛానెల్ నిషేధంపై స్టే విధించింది. ఈమేరకు హైకోర్టు న్యాయమూర్తి జస్టిస్ భట్టి తెలుపుతూ.. కేంద్రం ఉత్తర్వులను నాలుగు వారాలపాటు నిలిపివేస్తున్నట్లు తీర్పు చెప్పారు. అంతేకాదు.. ఈ విషయానికి సంబంధించిన సమగ్ర వివరాలతో కౌంటర్ దాఖలు చేయాలని కేంద్ర శాఖకు నోటీసులు జారీ చేశారు. దీంతో.. ఫిబ్రవరి 3వ తేదీ నుంచి 10 వరకు ఎన్టీవీ ప్రసారాలపై విధించిన నిషేధం చెల్లదన్నమాట! అంటే.. సాధారణంగా ఆ ఛానెల్ ప్రసారాలు కొనసాగుతాయి.

AS