‘జబర్దస్త్’ కమెడియన్ వేణుని అరెస్ట్ చేసిన పోలీసులు...

Posted: 01/28/2015 08:45 AM IST

ఓవైపు సినిమాలతోబాటు ‘జబర్దస్త్’ కామెడీ షోలోనూ కమెడియన్’గా దూసుకుపోతున్న వేణును మంగళవారం రాత్రి ఓయూ పోలీసులు అరెస్ట్ చేశారు. కామెడీ పేరిట ఓ కులవర్గాన్ని కించపరిచేవిధంగా వేణు వ్యవహరించాడన్న ఆరోపణల నేపథ్యంలో అతడిని పోలీసులు అదుపులో తీసుకున్నారు.

కొన్నాళ్లకిందట ‘జబర్దస్త్’ కామెడీ షోలో వేణు, అతని బృందం కలిసి ప్రేక్షకులను కడుపుబ్బా నవ్వించేందుకు ఓ స్కిట్ రెడీ చేశారు. ఆ స్కిట్ చేసి ప్రేక్షకులను బాగానే నవ్వించాడు కానీ.. ఓ కులవర్గ ఆగ్రహానికి గురయ్యాడు. తమ కులాన్ని, వృత్తిని కించపరిచేవిధంగా వేణు వ్యవహరించాడంటూ అతనిపై ఓ కులసంఘం నాయకులు ఫిర్యాదు చేయడం జరిగింది. ఆ ఫిర్యాదు మేరకు విచారణ చేపట్టిన పోలీసులు.. వేణును అరెస్ట్ చేశారు.

ఇటీవలే ఫిల్మ్ నగర్’లో కొందరు వ్యక్తులు వేణుపై దాడి చేసిన సంగతి విదితమే! మహిళలను, తమ వృత్తిని, కులాన్ని కించపరిచేవిధంగా స్కిట్ చేసినందుకే తాము అతడిపై దాడికి పాల్పడ్డామని పేర్కొన్నారు. ఆ నేపథ్యంలో అతనిపై కేసు నమోదు చేయడం కూడా జరిగింది!

AS