ఆ బిజినెస్ కేంద్రం గురించి ఇప్పుడే తెలిసిందా..?

Posted: 11/21/2014 02:50 PM IST

It is not ntr trust bhavan its a business center critisices talasani srinivas yadav

ఇటీవలే తెలంగాణ రాష్ట్ర సమితి తీర్థం పుచ్చుకున్న టీడీపీ సనత్ నగర్ ఎమ్మెల్యే తలసాని శ్రీనివాస్ యాదవ్ తన మాతృ పార్టీ టీడీపీపై మరోసారి విమర్శల వర్షం గుప్పించారు. ఎన్నికల ముందు సామాజిక తెలంగాణ, బీసీ సీఎం అని తెరమీదకు తెచ్చిన టీడీపీ... రెండు రాష్ట్రాల్లో బీసీలకు ఇచ్చింది 58 సీట్లేనని ఆరోపించారు. బీసీ సీఎం అని పార్టీలో చేర్చుకున్న ఆర్.కృష్ణయ్యకు కనీసం ప్లోర్ లీడర్ పదవి కూడా ఇవ్వలేదని తలసాని విమర్శించారు.

తెలంగాణలో టీడీపీ అధికారంలోకి వచ్చేవరకూ ఇక్కడే ఉంటానన్న చంద్రబాబు.... మరి కేంద్ర మంత్రిపదవికి తెలంగాణ టీడీపీ నేతలను ఎందుకు ఎంపిక చేయలేదని నిలదీశారు. దేవెగౌడను ప్రధాని చేశానంటున్న చంద్రబాబు...ఎన్టీఆర్కు ఎందుకు భారత రత్న ఇప్పించలేకపోయారని తలసాని సూటిగా ప్రశ్నించారు. ఆర్టీఐ చట్టం ఆసరాగా టీడీపీ ఎమ్మెల్యేలు బ్లాక్ మెయిలింగ్కు పాల్పడుతున్నారని తలసాని ఆరోపించారు. సొంత పార్టీ మనుషుల నుంచే డబ్బులు వసూలు చేశారని ఆరోపించారు. మైహోం రామేశ్వరరావు నుంచి రూ.10 కోట్లు డిమాండ్ చేశారని తలసాని తెలిపారు. అంతేకాదు ఎన్టీఆర్ ట్రస్ట్ భవన్ వ్యాపార కేంద్రంగా మారందని...అక్కడ జరిగేదంతా బిజినెస్సేనని ఆయన వ్యాఖ్యానించారు.

తలసాని విమర్శలపై తెలంగాణ టీడీపీ నేతలు కూడా మండిపడ్డుతున్నారు. ఇన్నాళ్లు ఎన్టీఆర్ ట్రస్ట్ భవన్ లోకి వచ్చిన తలసాని ఎన్ని బిజినెస్ వ్యవహారాలను చక్కబెట్టుకున్నారని నిలదీశారు. మంత్రిగా, హైదరాబాద్ టీడీపీ అధ్యక్షుడిగా వున్నంత కాలం గుర్తుకురాని విషయాలు ఇప్పుడెలా భయట పెడుతున్నారని ప్రశ్నించారు. టీడీపీతో బిజినెస్ ముగించుకుని, టీఆర్ఎస్ లోకి వెళ్లిన తలసాని తెలంగాణ భవన్ కూడా బిజినెస్ సెంటర్ చేస్తారని ఎద్దేవా చేశారు. ఏదో ఒక రోజు టీఆర్ఎస్ నుంచి కూడా బయటకు వచ్చి ఆ పార్టీపై కూడా తలసాని విమర్శలు చేస్తారని సూచించారు.

జి.మనోహర్