ఆసియా గేమ్స్ బాక్సింగ్ లో పెల్లుబిక్కిన ఫిక్సింగ్ ఆరోపణలు

Posted: 09/30/2014 03:43 PM IST

ఆసియా ఖండంలోని వివిధ దేశాల క్రీడాకారుల ప్రతిభకు పట్టం కట్టే ప్రతిష్టాత్మకమైన ఆసియా క్రీడల్లో ఫిక్సింగ్ ఆరోపణలు పెల్లుబిక్కాయి. ఇంచియాన్లో జరుగుతున్న 17వ ఆసియా క్రీడల్లో.. ముఖ్యంగా బాక్సింగ్ విభాగంలో కొత్త వివాదం తెరపైకి వచ్చింది. బాక్సింగ్ విభాగంతో తాము అద్భుత ప్రతిభను కనబర్చినా.. కేవలం మ్యాచ్ ఫిక్సింగ్ నేపథ్యంతో తమను ఓటినట్లుగా ప్రకటిస్తున్నారని భారత్ సహా మంగోలియా భాక్సింగ్ క్రీడాకారులు అరోపించారు.

భారత బాక్సర్ సరితాదేవి సెమీ ఫైనల్స్లో అద్భుతంగా పోరాడినా.. ఆమెను ఓడిపోయినట్లు ప్రకటించారని, దీని వెనుక మ్యాచ్ ఫిక్సింగ్ ఉందని ఆమె భర్త తోయిబా సింగ్ ఆరోపించారు. ఇది చాలా అనాగరికమైన నిర్ణయమని సరిత భర్త తోయిబా సింగ్ అన్నారు. ఈ బౌట్లో సరితాదేవి పూర్తి ఆధిపత్యం కనబర్చినా, చివరకు జడ్జిలు మాత్రం దక్షిణ కొరియాకు చెందిన జీనా పార్క్ గెలిచినట్లు ప్రకటించారని, అటు సరితాదేవి కూడా ఆగ్రహానికి గురైంది.

తమకు అన్యాయం జరిగిందంటూ మంగోలియా జట్టు ఫిర్యాదు చేసిన తర్వాత భారత జట్టు కూడా ఫిర్యాదు చేసింది. అంతర్జాతీయ బాక్సింగ్ సమాఖ్య దక్షిణ కొరియా ఆధిపత్యంలో ఉంది, కాబట్టే న్యాయనిర్ణేతలు ఇలా వ్యవహరించారని బాధితులు ఆరోపించారు. సరితాదేవి బౌట్ను సమీక్షించాలంటూ ఆమె భర్తతో పాటు టీమ్ కోచ్ సాగర్ ధైయ్యా కూడా ఫిర్యాదుచేశారు. ఇందుకోసం 500 డాలర్ల ప్రొటెస్ట్ ఫీజు కూడా కట్టారు.

బాక్సింగ్లో భారత్కు తాము అనేక పతకాలు తెస్తున్నామని, అయినా జట్టు యాజమాన్యం మాత్రం నిరసన విషయంలో తమకు అండగా ఉండట్లేదని సరితాదేవి వాపోయింది. ఈశాన్య ప్రాంతాలకు చెందినవాళ్లు భారతీయులు కారా అని ఆమె నిలదీసింది. సరితకు జరిగిన అన్యాయం విషయంలో మరో భారత బాక్సర్ మేరీ కోమ్ కూడా నిరసన వ్యక్తం చేసింది. ప్రత్యర్థి కొరియా బాక్సర్ కావడం వల్లే సరిత ఓడిపోయినట్లు ప్రకటించారని, ఇది చాలా దారుణమని మేరీకోమ్ వ్యాఖ్యానించింది. దీంతో 17 ధఫాలుగా జరుగుతున్న క్రీడలపై నీలి నీడలు అలుముకున్నాయి. విజేతలు నిజంగా ప్రతిభావంతులేనా.. లేక మ్యాచ్ ఫిక్సంగ్ లతో తెరపైకి వచ్చినవారా అన్న సందేహాలు కలుగుతున్నాయి.

జి. మనోహర్