పవన్ కల్యాణ్ కూడా తెలంగాణ ద్రోహియేనా..?

Posted: 08/28/2014 12:03 PM IST

Harish rao comments on pawan kalyan and medak mp seat elections

మెదక్ జిల్లా లోక్ సభ ఎన్నికలు రానురాను మరింత చర్చనీయాంశంగా మారుతున్నాయి. టీఆర్ఎస్, బీజేపీ పార్టీ సభ్యులు ఈ ఎన్నికల్లో తమ పార్టీయే గెలుస్తుందంటూ డప్పులు వాయించుకుంటూ.. ఒకర్నొకరిపై విమర్శలు చేసుకుంటున్నారు. మరోవైపు బీజేపీ పార్టీ అభ్యర్థిగా జగ్గారెడ్డి ఈ ఎన్నికల్లో పోటీ చేస్తున్న విషయం తెలిసిందే! అయితే జగ్గారెడ్డి ఇలా బీజేపీలో చేరడం వెనుక పవన్ కల్యాణ్ హస్తముందనే వార్తలు రాజకీయరంగంలో జోరుగా కొనసాగుతూనే వున్నాయి. ఈ విషయంపై కొంతమంది నాయకులు విమర్శలూ చేస్తే.. మరికొంత మాత్రం పొగడ్తలతో పవన్ కల్యాణ్ ను ముంచెత్తుతున్నారు. ఇందులో భాగంగానే హరీష్ రావు కొన్ని ఘాటు కామెంట్లను గుప్పించారు.

తెలంగాణా రాష్ట్ర ఏర్పాటును అడ్డుకున్న ఏపీ సీఎం చంద్రబాబునాయుడు, జనసేన పార్టీ అధ్యక్షుడు పవన్ కల్యాణ్ సిఫార్సులతో జగ్గారెడ్డిని ఎంపిక చేసే దయస్థితికి బీజేపీ చేరుకుందని హరీష్ రావు విమర్శించారు. అలాగే ఈ ఎన్నికల్లో నామినేషన్ వేయకముందే టీఆర్ఎస్ విజయం ఖరారైందని అన్నారు. రెండో స్థానంకోసమే బీజేపీ, కాంగ్రెస్ పార్టీలు ఈ పోటీలో పాల్గొంటున్నాయని ఆయన అన్నారు. ఈ ఎన్నిక తెలంగాణ ఉద్యమకారుడికి, తెలంగాణ ద్రోహులకు మధ్య జరుగుతోందని.. ఈ పోటీలో తెలంగాణ విజయం ఖాయమని ఆయన అన్నారు. దీంతో ప్రస్తుతం ఇది చర్చనీయాంశంగా మారిపోయింది. ఆయన నేరుగా పవన్ కల్యాణ్ ను ద్రోహి అయితే చెప్పలేదు కానీ.. తెలంగాణ రాష్ట్రానికి వ్యతిరేకంగా గళం విప్పినవారిని ద్రోహులుగా పేర్కొన్నారు. అంటే.. పరోక్షంగా పవన్ ను కూడా తిట్టినట్టేనని రాజకీయ విశ్లేషకులు అంటున్నారు.

ఈ నేపథ్యంలోనే హరీష్ రావు మాట్లాడుతూ.. ఆంధ్రామంత్రులకు వత్తాసు పలుకుతూ తెలంగాణ ఉద్యమకారులు, విద్యార్థులపైన కేసులు పెట్టించిన వారిని కాంగ్రెస్ పార్టీ తమ అభ్యర్థిగా నిలిపిందని అన్నారు. సమైక్యాంధ్ర నినాదంతో తెలంగాణవాదులపై దాడులకు దిగుతూ ప్రత్యేక రాష్ట్రం అవసరం లేదంటూ సోనియా గాంధీకిలేఖ ఇచ్చిన జగ్గారెడ్డిని బీజేపీ బరిలోకి దింపిందన్నారు. ఇటువంటివారిని తమ అభ్యర్థులుగా ప్రకటించిన బీజేపీ-టీడీపీ పార్టీలది సెల్ఫ్ గోల్ అని ఆయన పేర్కొన్నారు. పరోక్షంగా ఆ పార్టీలు ఓటమికి అంగీకరించాయన్నారు. మెదక్ స్థానం తమకే దక్కుతుందని ఆయన ధీమా వ్యక్తం చేశారు.