బాలలను పరామర్శించిన పవన్ కల్యాణ్

Posted: 07/24/2014 06:35 PM IST

మెదక్ జిల్లాలో గురువారంనాడు కాకతీయ స్కూలు బస్సును నాందెడ్ ప్యాసింజర్ రైలు ఢీకొన్న విషయం తెలిసిందే! ఇందులో దాదాపు 30 మందిదాకా విద్యార్థులు వుండగా... 20 మంది దుర్మరణం చెందారు. మిగిలిన విద్యార్థులు తీవ్రంగా గాయాలపాలయ్యారని, చికిత్స నిమిత్తం వారిని యశోద హాస్పిటల్ కు తరలించారు. ఈ నేపథ్యంలో జనసేన పార్టీ అధ్యక్షుడు, పవర్ స్టార్ పవన్ కల్యాణ్ చికిత్స పొందుతున్న చిన్నపిల్లలను పరామర్శించారు. ఆర్థనాదాలతో కన్నీరుమున్నీరవుతున్న తల్లిదండ్రులకు భరోసానిచ్చాడు.

అలాగే ఈ విషాదగాధకు విషయంపై పవన్ కల్యాణ్ మాట్లాడుతూ.... ఇటువంటి సంఘటనలు ఇప్పటినుంచి జరుగుతున్నవి కావు. మన కేంద్రప్రభుత్వాలు సరిగ్గా లేకపోవడం వల్లే ఇలా దారుణ సంఘటనలు జరుగుతున్నాయని ఆయన పేర్కొన్నాడు. ప్రభుత్వాలు ప్రజల పట్ల, అభివృద్ధి పట్ల సరిగ్గా శ్రద్ధ చూపితే ఇలాంటి దారుణాలు చోటుచేసుకునేవి కావని ఆయన అన్నారు. కనీసం ఈ దుర్ఘటనను అయినా దృష్టిలో పెట్టుకొని రాష్ట్రప్రభుత్వాలు, కేంద్ర ప్రభుత్వాలు తగిన చర్యలు తీసుకోవాలని ఆయన సూచించారు.

తాను చికిత్స పొందుతున్న చిన్న పిల్లల దగ్గరకు వెళ్లి పరామర్శించినప్పుడు అక్కడున్న పసివారి హృదయవిదారక యాతన చూసి తనకు ఏం చేయాలో పాలుపోవడం లేదని ఆయన ఆవేదన వ్యక్తం చేశారు. పిల్లల ఆరోగ్యం చాలా దారుణంగా వుందని, చావుబతుకుల మధ్య వారు కొట్టుమిట్టాడుతున్నారని... ఇంకో 12 గంటలు గడిస్తే గానీ క్షతగాత్రుల పరిస్థితి గురించి డాక్టర్లు చెప్పలేమని వైద్యులు తెలిపినట్లు పవన్ కల్యాణ్ తీవ్ర మనోవేదనతో తెలిపారు. ఇకనుంచైనా అన్ని రాజకీయ పార్టీలవారు తమతమ మనస్తత్వ భావాలను తొలగించుకుని, ప్రజల సంక్షేమానికి అవసరమయ్యే అన్ని ప్రణాళికలు, వారికి రక్షణ కలిగే దిశలో కమిటీలు ఏర్పాటు చేసి, చర్యలు తీసుకోవాలని ఆయన కోరుకున్నారు.