కప్పు కోసం కక్కుర్తిపడి రాణిగారు గుర్రంతో

Posted: 07/24/2014 10:17 AM IST

రాణిగారిని నమ్మకున్నందుకు .. నాలుగురిలో రేసు గుర్రం పరువు పోయింది. గుగ్గిళ్లు , పచ్చ గడ్డి, తింటూ హాయిగా ఉంటే రేసుగుర్రంతో.. రాణిగారు తప్పు పని చేయించారు. దీంతో.. అందరి ముందు, అదీ కూడా ఆడ గుర్రల ముందు మగ రేసుగుర్రం పరువు గంగలో కలిసిపోయింది. గర్వంగా బంగారు కప్పు తీసుకున్న తెల్ల గుర్రం కాస్తా.. నల్లగుర్రంగా మారిపోయింది. ఇంతకీ విషయం ఏమిటంటే.. బ్రిటన్ రాణి క్వీన్ ఎలిజెబెత్-2 కు చెందిన ఓ రేసుగుర్రం ఇటీవల రేసుల అనంతరం జరిపిన డోప్ టెస్టుల్లో అడ్డంగా దొరికిపోయింది.

ఆ గుర్రం నుంచి సేకరించిన రక్తనమూనాల్లో నిషేధిత ఉత్ప్రేరకం మార్ఫిన్ ఆనవాళ్లు బయటపడ్డాయి. మరో నాలుగు గుర్రాలు కూడా డోప్ టెస్టుల్లో పాజిటివ్‌గా తేలింది. గతేడాది జరిగిన ప్రతిష్ఠాత్మక గోల్డ్ కప్ రేసుల్లో ఈ గుర్రమే కప్పును గెలుచుకుంది. బంగారు కప్పు గెలిచిన మొట్టమొదటి రాజవంశపు గుర్రంగా ఎంతో పేరు ప్రతిష్ఠలు తెచ్చుకుంది. గుర్రానికి పెట్టే దాణాలో కల్తీయే ఇందుకు కారణమై ఉంటుందని బకింగ్‌హామ్ ప్యాలెస్ ఓ ప్రకటనలో తెలిపింది. నిషేధిత ఉత్ప్రేరకాలు వాడినట్టు తేలడంతో గుర్రం ఆ రేసులో గెలిచిన బంగారుకప్పుతోపాటు 80,625 పౌండ్ల ప్రైజ్‌మనీ కూడా పోయింది.