అమర్ నాథ్ యాత్రికుల మీద ఉగ్రవాదుల కన్ను!

Posted: 07/23/2014 10:35 AM IST

అమర్ నాథ్ యాత్రికుల మీద ఉగ్రవాదులు పంజా విసరటానికి చూస్తున్నారని భారత నిఘా సంస్థ మంగళవారం పార్లమెంట్ కి నివేదికనిచ్చింది.  స్టేట్ హోం మంత్రి కిరణ్ రిజిజు దీన్ని ధృవీకరిస్తూ అమర్ నాధ్ యాత్రికులు లక్ష్యంగా ఉగ్రవాదులు పన్నాగాలు పన్నుతున్నారన్న నిఘాసంస్థల నుంచి కేంద్ర, రాష్ట్ర ప్రభుత్వాలకు హెచ్చరికలు వచ్చాయని, ఈ సంవత్సరం అమర్ నాథ్ యాత్ర మొదలైన దగ్గర్నుంచీ జమ్ము కాశ్మీర్ లో గండెర్బాల్ జిల్లా లో యాత్రా బస్సులు, కార్ల మీద రాళ్ళు వెయ్యటం లాంటి వార్తలు అందుతూనేవున్నాయన్నారు.  యాత్రికులలో ఒకరికి గాయాలవటం, విండో పేన్స పగిలిపోవటం జరగటం వలన రాష్ట్ర ప్రభుత్వం అప్రమత్తమై యాత్రికులకోసం అదనపు భద్రతా ఏర్పట్లను చేసిందని అన్నారు.  

అమర్ నాథ్ యాత్రకు పోయే మార్గమంతా కూడా ప్రమాదకరంగా ఉగ్రవాద కార్యకలాపాలకు అనువుగా ఉందని జమ్మూ కాశ్మీర్ ప్రభుత్వం లోగడ ఒకసారి ప్రకటించింది.  అలాగే అమర్ నాథ్ యాత్రికుల భద్రతా ఏర్పాట్లను సరిచూసుకోమని కూడా భద్రతా దళాలకు సూచించింది.  

అమర్ నాథ్ యాత్రా మార్గం కొండప్రాంతం అవటం వలన ఉగ్రవాద చర్యలకు అనుకూలంగా ఉండటమే కాకుండా, అక్కడేమైనా జరిగితే ఆ వార్త దేశమంతా సంచలనం సృష్టించేదవుతుంది కాబట్టి కూడా ఉగ్రవాదులు ఆ ప్రాంతంలో వేటు వెయ్యవచ్చని, అందుకు సిద్ధంగా ఉండవలసిన అవసరం ఉందని జమ్మూ కాశ్మీర్ రాష్ట్ర ప్రభుత్వం ముందుగానే, పోయిన వారం అన్ని ఏజెన్సీలకు సూచిస్తూ, జూన్ 28 నుంచి మొదలయ్యే అమర్ నాథ్ యాత్ర సందర్భంగా వారి వారి పద్ధతుల్లో భద్రతను కలిగించవలసిందిగా ఆర్మీ, పోలీస్ శాఖకు  హెచ్చరికలు జారీచేసింది.  

దానితో పాటుగా ఏరియల్ సర్వేలను చేస్తూ అవసరం అనుకున్న ప్రాంతాలలో నిఘా పెంచుతూ భద్రతా సిబ్బందిని మోహరింపజేయమని కూడా రాష్ట్ర ప్రభుత్వం సూచించింది.  హిందువులకు పవిత్రమైన అమరనాథ్ గుహ దగ్గర సందేహాత్మకంగా తిరుగాడేవాళ్ళని కనిపెట్టమని కూడా సూచించటం జరిగింది.

-శ్రీజ